ਦੋ ਅੱਤਵਾਦੀਆਂ ਨੂੰ ਉਨ੍ਹਾਂ ਦੇ ਅੰਤ ਤੱਕ ਪਹੁੰਚਣ ਵਿੱਚ ਮਦਦ ਕਰਨ ਵਾਲਾ ਭਾਰਤੀ ਫੌਜ ਦਾ ਬਹਾਦਰ ਜ਼ੂਮ ਆਖਿਰਕਾਰ ਜ਼ਿੰਦਗੀ ਦੀ ਲੜਾਈ ਹਾਰ ਗਿਆ। ਉਹ ਸਿਰਫ਼ ਦੋ ਸਾਲ ਦਾ ਸੀ। ਦੋ ਗੋਲੀਆਂ ਲੱਗਣ ਤੋਂ ਬਾਅਦ ਉਸ ਦਾ ਖੂਨ ਵੀ ਵਗ ਰਿਹਾ ਸੀ। ਐਡਵਾਂਸਡ ਫੀਲਡ ਵੈਟਰਨਰੀ ਹਸਪਤਾਲ (54 AFVH) ਹਸਪਤਾਲ ਵਿੱਚ ਇਲਾਜ ਦੌਰਾਨ ਜ਼ੂਮ ਨੇ ਚੌਥੇ ਦਿਨ ਆਖਰੀ ਸਾਹ ਲਿਆ।
ਸੋਮਵਾਰ ਨੂੰ ਕਸ਼ਮੀਰ ਦੇ ਅਨੰਤਨਾਗ ‘ਚ ਅੱਤਵਾਦੀਆਂ ਦੇ ਤੰਗਪਵਾ ਇਲਾਕੇ ‘ਚ ਇੱਕ ਘਰ ‘ਚ ਲੁਕੇ ਦੋ ਅੱਤਵਾਦੀਆਂ ਦਾ ਪਤਾ ਲਗਾਉਣ ਲਈ ਸੁਰੱਖਿਆ ਬਲਾਂ ਨੇ ਜ਼ੂਮ ਨੂੰ ਭੇਜਿਆ। ਜ਼ੂਮ ਨੇ ਨਾ ਸਿਰਫ਼ ਇੱਕ ਅੱਤਵਾਦੀ ਨੂੰ ਟ੍ਰੇਸ ਕੀਤਾ ਸਗੋਂ ਉਸ ‘ਤੇ ਹਮਲਾ ਵੀ ਕੀਤਾ। ਅੱਤਵਾਦੀ ਨੇ ਗੋਲੀ ਚਲਾ ਦਿੱਤੀ, ਜਿਸ ‘ਚੋਂ ਦੋ ਜ਼ੂਮ ਨੂੰ ਲੱਗੀਆਂ ਪਰ ਇਸ ਹਾਲਤ ‘ਚ ਵੀ ਜ਼ੂਮ ਨੇ ਦੂਜੇ ਲੁੱਕੇ ਹੋਏ ਅੱਤਵਾਦੀ ਦਾ ਵੀ ਪਤਾ ਲਗਾ ਲਿਆ। ਇਸ ਤੋਂ ਬਾਅਦ ਉਹ ਵਾਪਸ ਆ ਗਿਆ ਅਤੇ ਬੇਹੋਸ਼ ਹੋ ਗਿਆ। ਉਦੋਂ ਤੱਕ ਉਸਦਾ ਖੂਨ ਕਾਫੀ ਵਹਿ ਚੁੱਕਾ ਸੀ। ਗੋਲੀਆਂ ਜ਼ੂਮ ਦੀਆਂ ਲੱਤਾਂ ਵਿੱਚ ਲੱਗੀਆਂ ਸਨ। ਸੁਰੱਖਿਆ ਬਲਾਂ ਨੇ ਵੀ ਮੁਕਾਬਲੇ ਦੌਰਾਨ ਦੋਵਾਂ ਅੱਤਵਾਦੀਆਂ ਨੂੰ ਮਾਰ ਮੁਕਾਇਆ।
ਫੌਜ ਦੇ ਅਧਿਕਾਰੀ ਨੇ ਦੱਸਿਆ ਕਿ ਜ਼ਖ਼ਮੀ ਜ਼ੂਮ ਦਾ ਸੋਮਵਾਰ ਤੋਂ ਇਲਾਜ ਚੱਲ ਰਿਹਾ ਸੀ। ਵੀਰਵਾਰ ਸਵੇਰੇ 11.45 ਵਜੇ ਤੱਕ ਵੀ ਉਹ ਜਵਾਬ ਦੇ ਰਿਹਾ ਸੀ ਪਰ ਫਿਰ ਅਚਾਨਕ ਉਸ ਨੂੰ ਸਾਹ ਚੜ੍ਹ ਗਿਆ ਅਤੇ 12 ਵਜੇ ਉਸ ਦੀ ਮੌਤ ਹੋ ਗਈ। ਫੌਜ ਦੇ ਅਧਿਕਾਰੀਆਂ ਦਾ ਕਹਿਣਾ ਹੈ ਕਿ ਅਸੀਂ ਟੀਮ ਦੇ ਅਜਿਹੇ ਬਹਾਦੁਰ ਮੈਂਬਰ ਨੂੰ ਗੁਆ ਦਿੱਤਾ ਹੈ, ਜੋ ਸਾਨੂੰ ਸਾਡਾ ਕੰਮ ਪੂਰੀ ਦ੍ਰਿੜਤਾ ਅਤੇ ਹਿੰਮਤ ਨਾਲ ਕਰਨ ਦੇ ਲਈ ਪ੍ਰੇਰਿਤ ਕਰਦਾ ਸੀ।
